Breastfeeding outside of the home Te whāngote i waho o te kāinga

He tikanga ngāwari te whāngote i tō pēpi i te wā e hāereere ana. He koreutu te waiū, he māota, ā, kāore e mate ki te taka kai. Nōu te mana ki te whāngai i tō pēpi ki ngā wāhi katoa, i ngā wā katoa hoki.

Ka whakamā pea ētahi mātua engari he mea māori noa te whāngote — ehara i te mea me huna. Anei ētahi huatau ki te āwangawanga koe.

• Kia mauri tau.
• Tonoa ō hoa me tō whānau ki te tautoko i a koe. Tonoa rātou kia noho ki tō taha i te whare kawhe, i tētahi tūru i te mōro rānei i a koe e whāngai ana i a pēpi.
• Kia hāneanea te noho. I mua o te tīmata, me whakarite he wāhi noho hāneanea, ā, he taituarā tōna.
• Me whakamātautau i mua o tō puta ki waho. Me whakamātau te whāngote i tō pēpi i mua i tētahi hoa, ki mua rānei i te whakaata ki te whakangungu i tō tūmahi, kia mōhio ki te tūmahi pai rawa mōu.
• Me mau ngā kākahu tōtika. Me mau pari whāngote, e taea ai te wewete mā te ringa kotahi. He pai hoki te mau i ngā tīhāte māmā ki te kukume whakararo, te hiki rānei.
• Ki te hiahia noho tūmataiti koe i te wā e whāngote ana, me tākai i a koe anō ki tētahi uhi nui, he papanga, he kāmeta, he paraikete rānei e iri ana ki ō pakihiwi.
• Whakamātauria hoki te okooko pēpi. Me mau ngā kākahu ngāwari ki te wewete, kia pai ai tō whāngote i tō pēpi me te kore e mate ki te tango i te okooko.

I ētahi wā, ka wehe ake koe i tō pēpi. Tērā pea nā tō hoki ki te mahi, kei te puta noa iho koe rānei, i pēnei ai. Ka taea e koe te kutē waiū, kia pai ai te whāngaihia o tō pēpi i a koe e ngaro ana. He kōrero anō kei Kidshealth mō te kutē me te pupuri waiū.

• Me pēhea te kutē waiū — KidsHealth (external link)↗
• Me pēhea te pupuri waiū — KidsHealth (external link)↗

Ka rere te waipiro i tō waiū ki tō pēpi, nā reira me kaua e inu waipiro i te wā e whāngote ana. Mā te inu waipiro:

• ka iti ake pea ō waiū
• ka kārangirangi, ka tūtakarerewa, ka hiamoe pea tō pēpi
• ka kore pea e tika te kai.

Ki te inu waipiro koe, kaua e whāngote i tō pēpi i ngā hāora e rua i muri iho. He pai ake te waiū kua kutētia i mua.

Ki te inu koe, me whakarite he tangata tiaki e mataara ana ki ngā hiahia o te pēpi, otirā he tangata kāore i te inu, i te kai whakapūroi rānei.