Getting COVID-19 vaccines Te whiwhi kano ārai mate KOWHEORI-19

He mate roma hā te KOWHEORI-19 ka pā ki ō pūkahukahu, arahau, me ētahi atu whēkau.

Kāore tonu e whakaatu ngā tamariki me ngā taiohi kua pāngia e te KOWHEORI-19 i ngā tohumate, he tohumate romahā māmā noa rānei, he rite ki te whurū. Engari, ka tino māuiui ētahi tāngata, ā, me kuhu pea ki te hōhipera.

Ko te hunga ka whiwhi ārainga mate ka iti iho te tūponotanga o te pāngia kinotia e te mate. Me rapu mōhio anō mō ngā tohumate KOWHEORI-19, te whakamātautau, te maimoatanga, me te maha atu.

Te KOWHEORI-19

Mēnā i pāngia koe e te KOWHEORI-19

Ahakoa i pāngia koe, ō tamariki rānei e te KOWHEORI-19, me whiwhi tonu koe i ō ārainga mate KOWHEORI-19 katoa e tūtohua ana. Ka whakaiti tēnei i tō mōrea ki te pāngia kinotia e te mate. Ka whakaiti hoki pea tēnei i te mōrea o te KOWHEORI roa.

Me tatari koe mō te 6 marama i muri i te pāngia e te mate ka whiwhi ai i ngā kano ārai mate KOWHEORI-19.

Mēnā he nui ake tō mōrea ki ngā mate kino ka āhei pea koe ki te whiwhi ārainga mate atu anō i mua o te 6 marama. Me kōrero ki tō kaiwhakarato hauora mō te wā e whiwhi anō ai koe i tō pota whai ake.

Kāore he utu mō ngā kano ārai mate KOWHEORI-19 i Aotearoa. Kāore he aha o tō tūnga kōkota, kirirarau rānei. Kāore e taea e koe te hoko tūmataiti i ngā kano ārai mate.

Ko te maha o ngā pota me whiwhi koe kei tō taipakeke me ētahi atu āhuatanga haumanu.

Me tirotiro nōnahea tō kano ārai mate KOWHEORI-19 whakamutunga.

My Covid Record (external link)↗

Ngā taipakeke 6 marama ki te 4 tau

Ka āhei anake ngā tamariki 6 marama ki te 4 tau te pakeke te werohia ki te kano ārai mate Pfizer mā te tamariki mēnā he nui ake tō rātau mōrea ki te mate kino mai i te KOWHEORI-19. Ko te take pea kua tino raruraru tō rātau ārai mate, he matatini, he huhua rānei ō rātau mate.

Ko ngā mate pea ko te:

• mate pūkahukahu pūmau
• ngā mate manawa kino pērā i te mate manawa kūkā, ngā mate manawa rānei nō te whānautanga mai
• matehuka
• mate tākihi pūmau
• mate ioio pūmau, uaua tōpū rānei pērā i te mate roro tuarongo
• Mate pūira kehe
• pūnaha ārai mate ngoikore, kei te whiwhi maimoatanga rānei mō te pēhi i te ārai mate pērā i te hahau
• ngā mate toto kino
• whiwhi huaranga i ngā marama 24 kua hipa.

Ka kitea e koe ētahi mōhiohio taipitopito atu anō mō ngā whakaritenga āheitanga kei te paetukutuku a Starship:

Ngā āhuatanga mōrea mō te KOWHEORI-19 i rō tamariki — Starship (external link)↗

Me whiwhi rātau i ngā pota e 3 o te kano ārai mate KOWHEORI-19 Pfizer.

• He 3 wiki i waenga i te tuku i te pota tuatahi me te pota tuarua.
• Ka tukuna te pota tuatoru i te 8 wiki i te iti rawa i muri i te pota tuarua.

Ko ngā tamariki ka whiwhi i te pota tuatahi i raro i te 5 tau me whiwhi tonu rātau i ngā pota e 3 — ahakoa ka huri rātau ki te 5 i muri i te whiwhi i te pota tuatahi, tuarua rānei.

Ko ngā tamariki 6 marama ki te 4 tau kāore ō rātau mate pēnei he tino iti noa te tūponotanga o te mate kino mai i te whakapokenga KOWHEORI-19, nō reira kāore i te āhei ki te whiwhi i te kano ārai mate.

Ka tukuna e tō rātau ake kaiwhakarato hauora ngā tohutohu mēnā kei te āhei rātau ki tēnei kano ārai mate.

5 ki te 11 tau

Ka taea te tiaki ngā tamariki 5 ki te 11 tau mai i te KOWHEORI-19 mā ngā pota tamariki e 2 o te kano ārai mate Pfizer, kia 8 wiki i te iti rawa i waenganui. Ka taea te whakapoto tēnei ki te 3 wiki te iti rawa mēnā e hiahiatia ana — hei tauira, mēnā kei te tīmata maimoatanga rongoā pēhi ārai mate nui rātau. Me kōrero koe ki tō rātau kaiwhakarato hauora mō tēnei.

Ka āhei pea ētahi tamariki he tino raruraru tō rātau ārai mate ki tētahi pota tamariki tuatoru.

Kāore ngā tamariki i te āhei ki tētahi wero whakakaha. He pai ngā pota e 2 ka tukuna ki a rātau mō te tiaki i a rātau mai i ngā mate kino mai i te KOWHEORI-19.

• 12 ki te 15 tau

Ka āhei ngā tamariki 12 ki te 15 tau ki ngā pota e 2 o te kano ārai mate Pfizer kia 8 wiki i te iti rawa i waenganui, o te kano ārai mate Novavax rānei kia 3 wiki i te iti rawa i waenganui.

Kāore ngā tamariki hauora i raro i te 16 tau i te āhei ki ngā wero whakapiki.

Ka āhei ngā tamariki 12 ki te 15 tau he nui te mōrea ki te mate kino ki te whiwhi wero whakakaha mā te rongoā tūtohu. Me kōrero ki tō rata, nēhi, kaiwhakarato hauora rānei mēnā e tūtohua ana tēnei, ā, me pēhea te whiwhi i tētahi rongoā tūtohu.

16 ki te 29 tau

E āhei ana te hunga 16 ki te 29 tau ki:

• ngā pota e 2 o te kano ārai mate Pfizer kia 8 wiki i te iti rawa i waenganui, kano ārai mate Novavax rānei kia 3 wiki i te iti rawa i waenganui
• 1 wero whakakaha i te 6 marama i muri i tō whiwhi kano ārai mate KOWHEORI-19 whakamutunga — e tūtohua ana kia tatari koe mō te 6 marama i muri i tō pāngia e te mate KOWHEORI-19 kātahi ka whiwhi i te wero whakakaha.

Ka āhei hoki te hunga e noho mōrea ki te mate kino mai i te KOWHEORI-19 ki tētahi pota whakakaha tāpiri. Ka uru ki tēnei:

• te hunga e tino raruraru ana tō rātau ārai mate
• ngā wāhine hapū
• te hunga he mate ō rātau e nui ake ai te mōrea o te mate kino mai i te KOWHEORI-19
• te hunga hauā he nui ngā matea hauora nui, matatini rānei ō rātau, he nui rānei ngā mate.

30 tau, pakeke atu

Ka āhei ngā pakeke 30 tau, pakeke atu te whiwhi:

• ngā pota e 2 o te kano ārai mate Pfizer kia 8 wiki i te iti rawa i waenganui, kano ārai mate Novavax rānei kia 3 wiki i te iti rawa i waenganui
• me ngā wero whakakaha mai i te 6 marama i muri i tō whiwhi kano ārai mate KOWHEORI-19 whakamutunga — e tūtohua ana kia tatari koe mō te 6 marama i muri i tō pāngia e te mate KOWHEORI-19 kātahi ka whiwhi i te wero whakakaha.

Ka āhei koe ki te whiwhi wero whakakaha atu anō ahakoa e hia ngā wero whakakaha kua whiwhi kē koe.

Ko te kano ārai mate KOWHEORI-19 matua ka whakamahia e mātau mō ngā pota matua i Aotearoa ka hangaia e Pfizer-BioNTech.

Pfizer

Ka whakamahia ngā kano ārai mate Pfizer mō:

• te hunga i raro i te 12 tau
• ngā tau 12, pakeke atu mō tētahi potanga matua
• ngā wero whakakaha
• ngā wāhine hapū.

Novavax

He kōwhiringa atu anō te kano ārai mate Novavax e wātea anake mō ngā:

• tau 12, pakeke atu mō tētahi potanga matua
• tau 18, pakeke atu mō tētahi wero whakakaha.

Ko te wā arowhānui i waenga i ō pota matua o te ārai kano mate Novavax he 3 wiki, neke atu rānei.

He iti rawa ngā raraunga mō te Novavax ki te tūtohu i te wā e hapū ana.

Te hapūtanga me ngā ārainga mate

Te mārama ki ngā kano ārai mate

Rapu mōhio atu anō mō ngā kano ārai mate kua whakaaetia hei whakamahi i Aotearoa, ā, he pēhea te mahi ki te tiaki i a koe.

Ngā kano ārai mate KOWHEORI-19 i Aotearoa

E tūtohua ana ngā kano ārai mate KOWHEORI-19: mō ngā rōpū katoa e rārangi ana i raro. Rapu mōhio atu anō mō ngā ārainga mate KOWHEORI-19 e ai ki tōu āhuatanga, ka mutu he pēhea te tiaki i a koe.

Mēnā he mate tonu tōu

Mēnā he mate tonu ōu, e tūtohua ana kia whiwhi kano ārai mate KOWHEORI-19 koe.

Ka whakahau mātau i a koe kia whiwhi i te kano ārai mate mēnā koe kei te:

• pāngia e te mate romahā kino, tae atu ki te mate pūkahukahu pūmau me te mate huangō
• mate manawa kino koe
• pāngia e ngā raruraru ārai mate
• mate āmai (toto pōrutu)
• matehuka
• mate tākihi pūmau
• mate ate
• ikura roro
• mate pukupuku
• pāngia e ngā tino mate hinengaro pērā i te māuiui wairua tuakoi (schizophrenia), te kōtonga nui rānei.

Mēnā he mate rerekē tōu, ā, kāore koe i te mōhio mēnā e tūtohua ana te kano ārai mate KOWHEORI-19, he māharahara rānei ōu, me kōrero ki tō kaiwhakarato hauora.

Mēnā he mate pukupuku koe

Mēnā he mate pukupuku koe, he nui ake tō mōrea ki te mate kino mai i te KOWHEORI-19.

Mēnā kei te whiwhi maimoatanga koe mō te mate pukupuku, ka āhei koe ki te whiwhi kano ārai mate KOWHEORI-19. Kāore he whakaaturanga e tukituki ana ki ngā maimoatanga mate pukupuku. E ai ki tō maimoatanga, ka taea pea e koe te whakarite tō kano ārai mate i waenga maimoatanga mō te urupare ārai mate pai rawa. Me kōrero koe ki tō rata, tō mātanga rānei mō te wā mō o ārainga mate.

Ko ngā pānga kino ka pā mai ki a koe ka ōrite ki te taupori whānui. Kāore he whakaaturanga e tohu ana mēnā he kino ake mēnā he mate pukupuku koe.

Mēnā i pāngia koe e te mate pukupuku i mua, ka mutu kua mutu tō maimoatanga, me whiwhi koe i te kano ārai mate ina taea e koe. Mēnā he māharahara ōu, me kōrero koe ki tō kaiwhakarato hauora.

Mēnā e pāngia e koe e te HIV

Mēnā e pāngia koe e te HIV, he nui ake tō mōrea ki te mate kino mai i te KOWHEORI-19.

I roto te hunga pāngia e te HIV i ngā whakamātautau haumanu mō te kano ārai mate Pfizer. Kāore i kitea e ngā whakaaturanga he kino ake ngā pānga kino o te KOWHEORI-19 mai i te kano ārai mate mēnā he pāngia koe e te HIV.

E ai ki ō mātau mōhio mō te hunga e pāngia ana e te HIV me tō rātau urupare ki ētahi atu kano ārai mate:

• he ngoikore ake pea tō urupare ki ētahi kano ārai mate, tae atu ki te kano ārai mate KOWHEORI-19
• mēnā he iti noa te huaketo i roto i a koe kāore e kore ka āhua tiakina koe mai i te kano ārai mate KOWHEORI-19

Mēnā kātahi anō ka whakatauhia koe, ā, kua tīmata koe i tō maimoatanga HIV, me kōrero koe ki tō mātanga mō te wā o tō whiwhi ārainga mate.

Ko ngā rongoā kei te whiwhi koe mō te HIV, tae atu ki PrEP, ko te tikanga kāore he pānga ki te whaitake o te kano ārai mate KOWHEORI-19. Kāore he pānga o te kano ārai mate ki ō rongoā HIV.

Mēnā kua raruraru tō ārai mate

Mēnā kua raruraru tō ārai mate, he nui ake tō mōrea ki te mate kino mai i te KOWHEORI-19.

Ka whiwhi koe i te kano ārai mate KOWHEORI-19 ina whiwhi rongoā, haumanu koe ka whai pānga ki tō pūnaha ārai mate. Pērā anō i ngā kano ārai mate, kāore pea e kaha tō urupare pērā i tētahi he tino kaha tōna pūnaha ārai mate. Mā te whiwhi i te kano ārai mate ka tiakina koe mai i te tino pāngia e te mate mēnā ka pā mai te KOWHEORI-19 ki a koe.

He pai ake te whiwhi ārainga mate i mua i te whiwhi maimoatanga kua whakaritea, engari kaua e hikina he maimoatanga. Me kōrero ki tō kaiwhakarato hauora, mātanga rānei mō te whiwhi i te kano ārai mate KOWHEORI-19.

Te pota matua tuatoru

Ko ētahi he 5 tau, pakeke he tino raruraru te ārai mate ka āhei ki te whiwhi i tētahi pota matua tuatoru o te kano ārai mate KOWHEORI-19.

Ko te tikanga me tuku i te 8 wiki i muri i te pota tuarua, engari ka taea te tuku i te 4 wiki i muri mai, e ai ki ngā haumanu pēhi ārai mate onāianei, kua whakaritea rānei.

He matatini ngā whakaritenga āheitanga mō te whiwhi pota matua tuatoru. E hāngai ana ki te hunga he tino raruraru te ārai mate.

Mā tō kaiwhakarato hauora koe e kōrero mēnā e āhei ana koe ki tēnei pota matua tuatoru. Mēnā ki ōu whakaaro kei te āhei pea koe, me kōrero koe ki a rātau.

Mēnā kei te hapū koe, kei te whāngai ū, kei te whakarite rānei kia hapū

Ka āhei koe ki te whiwhi i te kano ārai mate Pfizer ahakoa te wā o tō hapūtanga tae atu ki te whāngai ū, te whakahapū rānei. He iti rawa ngā raraunga mō te whakamahi i te Novavax mō te hunga e hapū ana, nō reira ko Pfizer te kano ārai mate e manakohia ana.

Mā te whiwhi kano ārai mate mai i te KOWHEORI-19 ko te tikanga kāore koe e pāngia kinotia e te mate. Ka āwhina tēnei ki te tiaki i tō pēpi mai i te KOWHEORI-19 i a koe e hapū ana, ā, i muri hoki i tōna whānautanga mai.

I tua atu i ō pota KOWHEORI-19 tuatahi e 2, ka āhei hoki te hunga hapū pakeke atu i te 16 te whiwhi wero whakakaha. Ko te hunga hapū e ahei ana ka taea te whiwhi wero whakakaha ahakoa te wāhanga o tō rātau hapūtanga, i te wā whāngai ū pea.

Mēnā he hauā koe, tētahi o te whānau rānei

Me kōrero koe ki tētahi kaitohutohu matatau nō te rōpū hautanga o Healthline mō te whiwhi i ō kano ārai mate KOWHEORI-19. He tāngata hauā katoa te rōpū nei e matatau ana ki ōna āhuatanga, i mahi rānei me te hapori hauā.

E wātea ana te rōpū tautoko hauātanga i te Mane ki te Paraire, mai i te 8am ki te 6pm.

• Waea: 0800 28 29 26 ka tīpako i te kōwhiringa 2
• Patowaea koreutu: 8988
• Īmēra: accessiblecovidvaccinations@whakarongorau.nz

Te whiwhi i tō kano ārai mate

Ina tae atu koe ki te wāhi tuku werohanga, me rēhita koe. Mēnā ka hiahia koe i tētahi kaiwhakamāori NZSL, kia takoto rānei ngā mōhiohio ki te hōputu tomopai, me pātai.

Ka tae mai te wa kia whiwhi ārainga mate, ka pātaitia koe e ngā kaimahi mēnā he pai noa iho te tuku kano ārai mate ki a koe. Ki te kī koe āe, e kīia ana ko te whakaae. Mēnā kāore e taea e koe te tuku whakaae, ka āhei te tangata kua whakaaetia ki te whakatau tikanga mōu te tuku whakaae mōu.

Ka pātai pea te kaiwero ki a koe mō tōu āhua, ā, he aha ngā rongoā ka whiwhi koe.

He pai noa iho mēnā kei te mataku koe, kei te māharahara rānei. Me pātai atu ki tō kaiwero mēnā he pātai āu.

Me tatari koe mō te 15 meneti i muri i tō whiwhi kano ārai mate. Mēnā he uaua tēnei mōu, me pātai koe mēnā ka āhei koe ki te tatari ki wāhi kē.

I mua i tō whiwhi ārainga mate, kei reira pea ētahi mea me whakarite e koe, me kōrero rānei ki tētahi kaiwhakarato hauora, ki tō kaiwero rānei.

Te whakarite i te wā o ō kano ārai mate Mpox me te KOWHEORI-19

E tūtohua ana kia 4 wiki i te iti rawa i waenga i ngā kano ārai mate Mpox me te KOWHEORI-19.

Ka āhei ki te tuku i ētahi atu kano ārai mate i mua, i muri, i te wā kotahi rānei o ētahi atu kano ārai mate KOWHEORI-19.

Mēnā i whiwhi koe i tō pota tuatahi i ētahi atu whenua

Mēnā ko tō pota tuatahi ko te kano ārai mate Pfizer

Ka āhei koe ki te whiwhi i tō pota tuarua i Aotearoa. Ko te tikanga me 3 wiki i muri i tō pota tuatahi.

Mēnā ko tō pota tuatahi ko te kano ārai mate AstraZeneca

Kua kore te kano ārai mate AstraZeneca e wātea i Aotearoa ināianei. Ka āhei koe ki te whiwhi i te kano ārai mate Novavax, te Pfizer rānei mō tō pota tuarua.

Mēnā he kano ārai mate rerekē tō pota tuatahi

I tēnei wā, e tūtohu ana mātau kia whiwhi koe i tētahi pota o te kano ārai mate Pfizer i Aotearoa.

Ina tāpui ana, ka pātaitia koe mēnā kua whiwhi kē koe i tētahi pota 1, ā, ko tēhea kano ārai mate, me te rā i whiwhi koe. Ka tātaitia e Book My Vaccine te wā e āhei ai koe ki te whiwhi i te kano ārai mate Pfizer.

Kāore e taea ēnei kano ārai mate te whakawhiti, engari ko te tikanga ka pai noa iho tō urupare ki tētahi pota kotahi tāpiri o te kano ārai mate Pfizer. Ko te take ka poke ngā kano ārai mate katoa i te urupare ārai mate ki te wāhanga tonu o te huaketo KOWHEORI-19.

Mēnā i whiwhi koe i te pota 1 o te kano ārai mate Johnson & Johnson (Janssen), ehara i te mea i whiwhi koe i tētahi pota tuarua.

Ngā wero whakakaha

Ko te kano ārai mate Pfizer te kano ārai mate matua e whakamahia ana i Aotearoa mō ngā wero whakakaha, ahakoa i whiwhi koe i tētahi kano ārai mate rerekē mō ō pota o mua atu. E wātea anake ngā wero whakakaha Novavax mō te hunga 18 tau, pakeke atu rānei.

Mēnā i pāwera koe ki tētahi kano ārai mate

Mēnā he pānga pāwera kino, wawe tonu rānei ki tētahi kano ārai mate, weronga rānei i mua, me kōrero atu koe ki tō kaiwero.

Ngā pānga kino me ngā tauhohenga

Mēnā ka pāngia koe e te tauhohe pāwera inati ki a koe

Me kōrero koe ki tō kaiwhakarato hauora ko tēhea te kano ārai mate pai rawa mōu mēnā ka pā mai te tauhohe pāwera inati:

• nā tētahi kai whakauru i roto i te kano ārai mate Pfizer, te kano ārai mate Novavax rānei
• nā tētahi pota o mua o te kano ārai mate Pfizer, te kano ārai mate Novavax rānei.

Mēnā me whiwhi āwhina koe i tō wā hui

Ina tāpui koe i tō whiwhi kano ārai mate, ka pātaitia koe mēnā ka whiwhi āwhina koe i tō wā hui.

Kei roto i ngā āwhina ko:

• tētahi kaiwhakamāori reo rotarota o Aotearoa
• ngā tautoko ki te whakatau tikanga
• ngā āwhina nekeneke haere
• tētahi wā hui roa ake
• tētahi wāhi mārire
• tētahi wāhi nui ake hei nekeneke haere.

Mēnā ka tāpui tuihono koe, me whakapā atu pea mātau ki a koe ki te whakarite kei te ū mātau ki ō whakaritenga i tō wāhi tuku ārainga mate ka kōwhiria e koe.

Mēnā kei te whiwhi matawai CT koe, matawai ū, matawai pāorooro, MRI rānei i muri i tō whiwhi kano ārai mate

Me whakamōhio atu koe ki te ngaio matawai, te mātanga rānei i whiwhi ārainga mate koe i nā tata nei.

Ka pupuhi pea i te kano ārai mate ngā pona taikiri kei ō kēkē, tō kakī rānei mō ētahi rā. Ka kitea pea tēnei i runga i tētahi mīhini matawai ū matawai pāorooro, matawai MRI rānei mō ētahi wiki i muri mai.

Kaua e takaroa te tāpui i ēnei wā hui. Mēnā he māharahara ōu, me kōrero ki tō mātanga, tō ngaio matawai rānei.

Te tuku whakaae mōu, mō ō tamariki rānei

I mua i tō whiwhi kano ārai mate, ka pātaitia koe:

mō tō ingoa, te rā whānau me te wāhi noho kia pai ai tā mātau whakatūturu i tēnei i te Rēhita Ārainga Mate o Aotearoa — ehara i te mea me whakaatu tuakiri koe

kia tuku i tō whakaae ā-waha kia whiwhi ai i te kano ārai mate — he tikanga noa ēnei mō tētahi werohanga.

Whakaaetanga mō ngā kano ārai mate tamariki

Me haere tētahi pakeke tōtika i te taha o te tamaiti ki tana wā hui. Arā, ko tētahi matua, tētahi pakeke o te whānau, he hoa pono nō te whānau, he mana ā-ture, he kaitiaki rānei.

Me tuku whakaae tētahi kaitiaki ā-ture o te tamaiti mōna mēnā kei raro ia i te 12 tau.

Mēnā ehara te pakeke e haere ana me te tamaiti ki te wā hui i te kaitiaki ā-ture o te tamaiti, me:

• whakaū ā-waha te kaiwero i tēnei mā runga waea me tētahi kaitiaki ā-ture e whakaae ana ia kia whiwhi ārainga mate te tamaiti
• heri rānei te pakeke tōtika i tētahi kape o te puka whakaae werohanga KOWHEORI-19 kua waitohua, kua whakaotihia hoki e tētahi kaitiaki.

Puka whakaae werohanga KOWHEORI-19 [PDF, 244 KB] (external link)↗

He hātepe tuku whakaae arowhānui tēnei.

Ngā taiohi 12 tau, pakeke atu

Ahakoa e ahei ana te hunga taiohi 12 tau, pakeke atu ki te tuku i tā rātau ake whakaae, e tūtohu ana mātau kia kōrero rātau ki ō rātau mātua, whānau, he tangata tautoko pono rānei mō tēnei.

Ka kōrero hoki tētahi ngaio hauora mō te kano ārai mate ki a rātau i mua i te tuku i te ārainga mate. Kei a rātau te tikanga ki te ki āe, kāo rānei, kia whai kaitiaki rānei hei tuku whakaae mō rātau. 

Mēnā he hauā koe, kua waimaerotia rānei

Ka tae mai te wa kia whiwhi ārainga mate, ka pātaitia koe e ngā kaimahi mēnā he pai noa iho te tuku kano ārai mate ki a koe. Ki te kī koe āe, e kīia ana ko te whakaae. Mēnā kāore e taea e koe te tuku whakaae, ka āhei te tangata kua whakaaetia ki te whakatau tikanga mōu te tuku whakaae mōu.

Pērā anō i te nuinga o ngā rongoā, ka pā mai pea ngā tauhohenga i ngā kano ārai mate. I te nuinga o te wā he māmā ēnei, ā, kāore e pā mai ki te katoa.

Ka pā noa mai ai ngā tauhohenga māmā, ka mutu e whakaatu ana kei te urupare tō pūnaha ārai mate ki te kano ārai mate.

Rapu mōhio atu anō mō ngā pānga kino noa o te kano ārai mate, ngā tauhohenga rānei, ā, me aha koe mēnā ka pā mai ki a koe.

Ngā pānga kino o te kano ārai mate, ngā tauhohenga me te haumaru

Tuihono, i runga waea rānei

Ka taea te tāpui tuihono, i runga waea rānei mō te tuku ārainga mate mō te tangata takitahi, mō ngā rōpū rānei. Ka āhei hoki koe ki te huri, te whakakore tuihono rānei i tō tāpuitanga.

• Tāpui tuihono: Book My Vaccine (external link)↗
• Te tāpui mā runga waea: 0800 28 29 26 (8am ki te 6pm, Mane ki te Paraire).

Rapu mōhiohio atu anō mō te tāpui i te whiwhi kano ārai mate, me pēhea rānei te whiwhi tautoko tauwhāiti mō ō hiahia.

Te tāpui i te whiwhi ārainga mate

Haere ki tō kaiwhakarato hauora, taka rongoā rānei

Kei te whakarato anō pea tō kaiwhakarato hauora, tō whare hauora, tō taka rongoā rānei i ngā ārainga mate KOWHEORI-19. Kia mōhio ai, me waea tonu atu, haere rānei ki te paetukutuku a Healthpoint.

Ngā ārainga mate KOWHEORI-19 — Healthpoint (external link)↗

Mēnā e hiahia ana koe ki te whakarite kia whiwhi kano ārai mate Novavax koe

Tirohia te mahere o te wāhi werohanga hei kimi i tētahi wāhi tūtata ki a koe kei te whakarato i te Novavax.

Tīpakohia te 'Novavax ages 12+ only' i raro i te 'Vaccine type'.

Mapi o te wāhi tuku werohanga (external link)↗

Ngā wāhi tuku ārainga mate tomopai

He tino tomopai ētahi wāhi tuku ārainga mate. Kei te tuwhera anō ki tō whānau me ō kaimahi tautoko kia whiwhi kano ārai mate anō rātau me koe. Kimihia he wāhi werohanga tomopai i Healthpoint.

Ārainga mate KOWHEORI-19 — Healthpoint (external link)↗

Ka āhei koe ki te kōrero ki te rōpū hauātanga e tino mātau ana ki te hauātanga. Ka taea e rātau koe te tautoko me:

• ngā whakaritenga tomopai me te whiwhi āwhina ki te hāereere i ngā wāhi rerekē
• te whiwhi haumaru i tō kano ārai mate
• ngā ārainga mate kāinga
• ngā pānga kino o te kano ārai mate pea ki a koe, ki ō rongoā rānei.

E wātea ana te rōpū tautoko hauātanga i te Mane ki te Paraire, mai i te 8am ki te 6pm.

• Waea: 0800 28 29 26 ka kōwhiri i te kōwhiringa 2
• Patowaea koreutu: 8988
• Īmēra: accessiblecovidvaccinations@whakarongorau.nz

Te whiwhi ārainga mate i te kāinga

Mēnā ka uaua ki te tangata te wehe pai mai i tōna kainga ka āhei pea koe ki te whiwhi ārainga mate i te kāinga.

Me kōrero ki tō rata, waea atu rānei ki te COVID Vaccination Healthline i 0800 28 29 26 hei kōrero mō ngā kōwhiringa ka tino ū ki ō hiahia.